ОРХОН АЙМГИЙН НИЙГМИЙН ДААТГАЛЫН ХЭЛТЭС

МЭНДЧИЛГЭЭ

Улс үндэстний маань хөгжил дэвшил, өв соёлын түүхийг бүтээгч Азай буурал ахмадууд, тэтгэвэр авагчид аа,

Зууны манлай бүтээн байгуулалт “Эрдэнэт” хотын ажилсаг хөдөлмөрч ажил олгогч, даатгуулагчид, иргэдээ

Та бүхэндээ XYII жарны “Урвуулагч” хэмээх шороон гахай жилийн Сар шинийн баярын мэндийг дэвшүүлж эрүүл энх, аз жаргал, эрхэм бүхнийг хүсэн ерөөе.

Улиран одож буй “Тийн унжлагат” хэмээх шороон нохой жил Орхон аймгийн иргэд, ажил олгогч, даатгуулагчдад үр өгөөж, буян хишгээ хайрласан сайхан жил болон өндөрлөж аймгийн нийгмийн даатгалын сангийн орлогод 62.3 тэрбум төгрөг оруулж, 79.4 тэрбум төгрөгийг нийгмийн даатгалын 5 сангаар дамжуулан аймгийнхаа 230.0 гаруй мянган иргэнд олголоо.

Засгийн газар болон аймгийн Засаг даргын 2016-2020 оны үйл ажиллагааны хөтөлбөрийг хэрэгжүүлэн ажилласны үр дүнд ажлын байр нэмэгдэж албан журмын даатгуулагчдын тоо өссөний зэрэгцээ сайн дурын даатгуулагчдын тоо 6669 болсон нь иргэдийн нийгмийн даатгалын талаарх ойлголт, ач холбогдлыг ойлгох ойлголт сайжирсан байна.

Иргэдийг эрсдэлээс хамгаалах, нийгмийн даатгалын хууль тогтоомжийг сурталчлах, олон нийтийг соён гэгээрүүлэх улмаар хүний суурь хөгжлийг хангах зорилгоор улиран одож буй нохой жилдээ бид иргэн төвтэй төрийн үйлчилгээг цахим засаглал, бүтээмж инновацийг хөгжүүлэх замаар үзүүлж, иргэдийн чирэгдэл олон шат дамжлагыг багасган шинэ менежмент, зохион байгуулалт хийснээс гадна “Нийгмийн даатгалын төлөөлөгч”, “Ухаалаг ногоон ажлын байр”, “Нийгмийн даатгалын хиймэл оюун ухаан” зэрэг иргэд, даатгуулагчдад чиглэгдсэн олон төсөл хөтөлбөрүүдийг амжилттай хэрэгжүүллээ. Үүний үр дүнд давхардсан тоогоор 277.0 гаруй мянган хүнд хүрч ажилласан байна. Иргэд, олон нийтдээ чиглэсэн бодлого хэрэгжүүлж, нийгмийн хариуцлагын болон чанарын удирдлагын олон улсын стандарт нэвтрүүлэн үр нөлөө гарсныг үнэлэн Монголын хэрэглэгчдийн эрх ашгийг хамгаалах холбоо “Хэрэглэгчийг хаанд өргөмжилсөн хамт олон” цол өргөмжлөлийн эзэн байгууллага болголоо.

Эрхэм Эрдэнэтчүүдээ.

Манай ард түмэн үндэсний уламжлалт Цагаан сараар гэр бүл, ахан дүүсээрээ хуран цуглаж, амар мэндээ айлтган мэдэлцэж, хийж бүтээснээ дүгнэн цэгнэж, ирж буй жилийн өнгийг аз жаргал, амжилт бүтээлээр бэлэгшээдэг сайхан заншилтай билээ.

“Урвуулагч” хэмээх шороон гахай жил нийт тэтгэвэр авагч ахмадуудад урт нас, ая тухтай амьдрал, өсвөр багачуудад эрүүл энх, инээд хөөр, залууст эрдэм боловсрол, ирээдүйг бүтээх эрмэлзэл, нийт даатгуулагчдад маань эрч хүч, золбоо хийморийг авчрах болтугай.

Сар шинэдээ сайхан шинэлээрэй.

ОРХОН АЙМГИЙН НИЙГМИЙН ДААТГАЛЫН ХЭЛТСИЙН ДАРГА БАЯРСАЙХАНЫ АНАР